Шилдэг тоглогчоо үдэх үү?

Дэрэн клуб болон Герт Энгельсийн https://en.soccerlifefussballschule.com/ академийн хамтын ажиллагааны хүрээнд Герман улсад туршилтын бэлтгэлд хамрагдахаар болсон О.Мөнх-Оргилтой ярилцсанаа хүргэе.

Герман явахаар болсон тухай зарласан нийтлэлийн дор их олон хүн амжилт хүссэн байсан. Ямар сэтгэгдэлтэй байна?

– Их баярласан. Гэхдээ бас их хариуцлага үүрч байгаа юм шиг санагдаж байна.

Явахаар болсоноо хэрхэн хүлээж авсан бэ?

– Ер нь тоглогч бүр л гадаадад өөрийгөө сорихыг хүсдэг шүү дээ. Тиймээс ч улирал бүр өөрийн тоглолтоо эргэн харж, тоглолтуудын онцлох агшны дүрс бичлэгээ түүвэрлэн бэлтгэдэг. Нэг ёсны CV гэх үү дээ. Тэгээд хоёр сар орчмын өмнө надад энэ тухай мэдэгдсэн л дээ. Энэ нь надад бас бэлтгэлээ базаах хугацаа гаргаж өгч байгаа юм. Ер нь бол өнөө маргаашгүй Германыг зорих боломжтой ч бидний хувьд өвлийн амралт таарсан учир мэдээж тодорхой хэмжээнд бэлтгэл сургуулилтаа хангах хугацаа олгосонд талархаж байна.

Ялангуяа Герман улсад туршилтын бэлтгэлд хамрагдахаар болсон тухайд ямар бодолтой байна вэ? Боломж хэр байгаа бол?

– Мэдээж боломжгүй зүйл үгүй л гэж бодож байна. Явах гэж байгаа газрынхаа хөлбөмбөгийн тухай сонирхон судалсан л даа. Ер нь Европ, тэр дундаа Германд бүх багууд нь л мэргэжлийн гэж ойлгож байгаа. Жишээ нь өнгөрсөн жил Германы цомын тэмцээнд тавдугаар лигийн баг нь Байерн Мюнхентэй тоглоод 3:0-ийн харьцаатай хожигдож байна гэхээр бүх түвшиндээ л мэргэжлийн багууд гэж ойлгож болохоор байгаа юм. Зохион байгуулалт, хувь тамирчнаас шаардах ур чадвар бүгд л өндөр түвшинд гэж бодож байна.

Тэгэхээр хувийн бэлтгэлээ хэрхэн хангаж байгаа вэ?

– Бие бялдарын бэлтгэлээ сайн хангахыг хичээж байгаа. Учир нь очоод л шууд бэлтгэлд хамрагдана шүү дээ. Гэтэл энд маань өвөл болчихсон, том талбайд бэлтгэлээ хийж чадахгүй болохоор биеэ сайн бэлдэхийг л хичээж байна. Тэгэхгүй бол очоод бэлтгэлийн үеэр бэртэх ч эрсдэлтэй. Бас клуб маань Эйр домоо ашиглалтад оруулсан нь их хэрэг боллоо. Ялангуяа зүлгэн дээр хөлбөмбөгийн пүүзтэйгээ гүйж, талбайн бөмбөгөөр тоглоно гэдэг их чухал шүү дээ. Хэдийгээр гадаа цастайд гүйж, эсвэл дотор орчинд гүйлтийн зам дээр гүйж болох ч энэ нь тэнд очоод зүлгэн дээр бэлтгэл хийхээс тэс өөр зүйл.

Дэрэн клубд хэзэнээс хойш тоглож байна вэ?

– Би анх 2014 оны зун 15 настайдаа Дэрэн клубд элсэж байсан. Тэгээд 2015 оноос хойш Дээд лигт тоглож байна. Ялангуяа өнгөрсөн улирал бидний хувьд үнэхээр онцгой жил байлаа.

Өнгөрсөн жилийн өөрийнхөө тоглолтыг хэрхэн дүгнэж байна вэ?

– 2020 оны лигт зарим тоглолтод нь би багтаа туслахын тулд довтлогчийн байрлалд гарч байсан бол өнгөрсөн жил голчлон төвийн хамгаалалтаа тоглосон. Үндсэн байрлалынхаа хувьд зарим чадвараа илүү сайжруулж чадсан гэж бодож байна. Мэдээж сурах, туршлагажих зүйлс олон бий.

Чиний байрлал дээр Европын тоглогчдын эсрэг ямар байх бол?

– Мэдээж Европд төвийн хамгаалалтад ихэвчлэн нуруулаг, хүчтэй байдгаас гадна сүүлийн үед довтолгоо эхлүүлэхэд идэвхтэй оролцдог болсон. Миний хувьд дундаж өндөртэйд л тооцогдох байх. Гэхдээ аль болох тоглолтыг нь сайн уншихыг хичээж, ялангуяа хоёрдугаар давхрын тоглолтод их сайн хичээх хэрэгтэй байх гэж бодож байна. Учир нь манай лигт төдийлэн хоёрдугаар давхрын тоглолтууд тийм ч идэвхтэй байдаггүй гэж болно. Гэтэл шигшээ багт тоглоход хоёрдугаар давхарт их хүчтэй тулаанууд болдог.

Дээд лигт долоон жил тоглосоны хувьд Монголынхоо хөлбөмбөгийг юу гэж боддог вэ? Германд очоод хэр ялгаатай байх бол?

– Мэдээж Германд хөлбөмбөг их олон жилийн түүхтэй, туршлагатай, өндөр түвшний хөгжилтэй ч манай хөлбөмбөг сүүлийн жилүүдэд их сайн хөгжиж байна гэж боддог. Олон авьяаслаг залуус ч гарч ирж байна шүү дээ.

Хэр догдолж байна?

– Жаахан сандарч л байна. Гэхдээ бүх зүйл л надаас шалтгаална шүү дээ. Би хэр сайн байна, төдий чинээ сайн багт тоглох боломж үүсэх болохоор аль болох чадах бүхнээ дайчлахыг хичээнэ дээ.

Ярилцсанд баярлалаа. Амжилт хүсье.

– Баярлалаа.

Эх сурвалж: Дэрэн клуб